અગ્નિવીર હવે ચારને બદલે છ વર્ષ સુધી સેનામાં નોકરી કરી શકશે. ચીફ ઑફ ડિફેન્સ સ્ટાફ જનરલ એનએસ રાજા સુબ્રમણીએ બુધવારે બે વર્ષનો સેવા વિસ્તરણ આપવાની જાહેરાત કરી. હાલમાં દરેક બેચના 25% અગ્નિવીરોને ચાર વર્ષ બાદ મેરિટના આધારે નિયમિત સેનામાં સામેલ કરવામાં આવે છે. બાકીના 75%ને સેવામાંથી બહાર થવું પડે છે. નવા નિયમમાં 25% અગ્નિવીરોને નિયમિત કરવાનો જૂનો નિયમ ચાલુ રહેશે.બાકીના 75%ને તેમની સંમતિથી વધુ બે વર્ષ નોકરી કરવાની તક મળશે. આ દરમિયાન તેમને વધારેલો પગાર અને ભથ્થાં પણ મળશે.છ વર્ષ બાદ પણ સેનામાં નોકરી કરવા ઇચ્છુક અગ્નિવીરોને પસંદગી પ્રક્રિયામાંથી પસાર થવું પડશે. હાલમાં ત્રણેય સેનાઓમાં આશરે 3.18 લાખ અગ્નિવીર સેવા આપી રહ્યા છે. આંકડા મુજબ, 31 ડિસેમ્બર સુધીમાં પ્રથમ બેચના આશરે 18,300 અગ્નિવીરોનો ચાર વર્ષનો કાર્યકાળ પૂર્ણ થવાનો છે. પહેલાં નક્કી કરાયેલી યોજના મુજબ નવેમ્બરના મધ્યથી 75% અગ્નિવીરોને તબક્કાવાર રીતે સેવામાંથી મુક્ત કરવાના હતા. નવી વ્યવસ્થા હેઠળ હવે તેમને બે વર્ષનો વધારાનો સમય મળશે. આ સેવા વિસ્તરણ અગ્નિવીરોની સંમતિથી કરવામાં આવશે. ગયા મહિને એરફોર્સે પોતાના પ્રથમ અગ્નિવીર બેચના 2,850 રિક્રૂટ્સમાંથી 712ને નિયમિત સેવામાં જાળવી રાખવાનો નિર્ણય કર્યો હતો. અગ્નિપથ યોજના 14 જૂન 2022ના રોજ શરૂ કરવામાં આવી હતી. તેના હેઠળ આર્મી, નૌસેના અને વાયુસેનામાં ચાર વર્ષ માટે અગ્નિવીરોની ભરતી કરવામાં આવે છે. ભરતી પ્રક્રિયા અને લાયકાત ત્રણેય સેનાઓમાં અલગ-અલગ હોય છે.
અગ્નિવીરોનો કાર્યકાળ 2 વર્ષ વધારાયો:હવે 6 વર્ષ સુધી નોકરી કરી શકશે (Top Stories) ને Aapnu Amdavad પર દર્શાવવામાં આવ્યું છે — અમદાવાદનું ડિજિટલ ઘર, જ્યાં અમદાવાદીઓ સમાચાર અને શહેરમાં થઈ રહેલી દરેક વસ્તુ શોધે છે.
